7000 عام من اللذة | “مشروع تخرجي كان بيندرج تحت بند Food Culture Studies (دراسات الثقافة الغذائية) وده مجال معروف أكثر برة مصر، بالذات في الجامعات كمجال اكاديمي معروف، المجال ده بيهتم بدراسة علاقة الاكل بثقافات الشعوب والهوية، وإزاي من خلال دراسة اصول الاكل وطرق الطهي اقدر اعرف كثير عن طريقة التفكير والتعبير عن النفس وعن علاقتي بالطرف الاخر، الاكل زيه زي اي أداة تانية بتستخدم لإثبات القوة والسيطرة بين الأفراد والامبراطوريات، انا بشوف أنه مجال مثير ومختلف جدا ولازم يتعرف في مصر بشكل أكبر لانه بيبص على التاريخ من زاوية شخصية جدا، زاوية تخص الناس مش الملوك وبس.

فكرة الكتاب كانت دايما في بالي، بس كنت مترددة، ولما جبت تقدير عالي في مشروع تخرجي، في اللحظة دي اتاكدت اني هاعمل ده من غير تفكير.

في الكتاب بأحاول استكشف الهوية المصرية أكثر وليه احنا بنفكر وبنشوف الحياة من حوالينا بطريقة معينة وليه بناكل الاكل ده النهاردة وإزاي ممكن يكون الاكل وسيلة للتعبير عن نفسنا هويتنا وتوثيق تاريخنا بطريقة مختلفة.

الكتاب ده هو بداية لكتب وافكار كثير في مجال الأكل ومجالات تانية يمكن يكون نادر الكتابة عنها أو البحث فيها، لكنها كلها في الاخر بتدور حوالين الدراسات الإنسانية.