شُفتها بعيني وهي داخلة المكتبة، بتبص حواليها يمين وشمال وكأنها بتتأكد إن مفيش حد موجود. في لحظة كانت خاطفة الكتاب ومخبياه ورا ضهرها. بصراحة، في البداية – ورغم مظهرها الأنيق – توقعت أنها هتسرق الكتاب وتهرب، لكن اللي حصل عكس توقعي تمامًا. فجأة لقيتها بتتحرك ناحية الكاشير بتوتر شديد، دفعت بسرعة، وطلعت جري بره.

طبعًا الفضول مكنش سايبني، فروحت أسأل الكاشير إيه اللي خلى البنت تبقى متوترة كده؟
– يا باشا، الموضوع ده عادي، أي واحدة بتشتري الكتاب ده بتكون مكسوفة وخايفة حد يشوفها.
– ليه بقى؟ هو كتاب خطير ولا إيه؟
– يا ريت يكون كتاب زي “كيف تزرع الهيروين”! ده كتاب «Why Men Love Bitches» بتاع «شيري أرجوف».

ساعتها ضحكت من قلبي، فاكرًا شكل محمود صاحبي ليلة زفافه وهو داخل الصيدلية يسأل عن “حبوب منشطة”… للذاكرة!